ՏԵՍԱՆՅՈՒԹ․ Սահմանից զինծառայողներ են կորում, իշխանությունը զինծառայողների է կալանավորում. պատգամավոր

«Հասել ենք մի կետի, երբ սահմանից զինծառայողներ են կորում, անհայտ, տարօրինակ պայմաններում գերեվարվում ու սրա պատասխանատուները անմեղ դեպքով խոսում են մեր երկրի առաջընթացի և ապագայի մասին»,- խորհրդարանի ամբիոնից ելույթում հայտարարեց «Պատիվ ունեմ» խմբակցության պատգամավոր Տիգրան Աբրահամյանը։

2021 թվականի նոյեմբերի 16-ին ադրբեջանական ագրեսիայի հետևանքով հայկական զինուժի 32 զինծառայող գերեվարվել է, նրանցից վեցը գերության մեջ է, իսկ հայրենադարձված զինծառայողների մի մասի նկատմամբ քրեական գործեր են հարցուցված։

Աբրահամյանի պնդմամբ, այդ զինծառայողների մեջ կան այնպիսիները, որոնք երկար տարիներ ծառայել են ՀՀ և Արցախի տարբեր զորամասերում, մարտական գործողություններին մասնակցել, վիրավորվել, սակայն չգիտես ինչո՞ւ՝ իշխանությունն այդ մարդկանց առանց օրինական վճռի մեջ մտած դատավճիռների նշանակել է մեղավորներ ու խաչ քաշել մարդկային ճակատագրերի վրա։
Զինծառայողներից մեկը՝ Արեն Արամյանը, ով ադրբեջանական հարձակման հետևանքով վիրավորում է ստացել և կալանքի տակ է, այսօր էլ անհրաժեշտ բուժում ստանալու հնարավորություն չունի։

«Երկար ժամանակ է, որևէ տեղեկություն չկա 44 օրյա պատերազմի և դրանից մեկ ամիս անց Հադրութի Հին Թաղեր և Խծաբերդ գյուղերում գերեվարված զինծառայողնրի ճակատագրի մասին»։

Աբրահամյանը նշեց, որ քաոսի պայմաններում զինծառայողները հայտնվել են անելանելի վիճակում։ Իշխանությունը նախապես մեղավորներ է նշանակել, զինծառայողների է կալանավորել, փորձել է ցույց տալ, որ իրավիճակի ողջ պատասխանատվությունը կրել են այդ հատվածում ծառայություն իրականացնող ստորաբաժանումները, զինծառայողները, իսկ իշխանությունը շարունակում է արդարանալ ու մոլորեցնել հանրությանը։